Ինչպե՞ս հրապարակել սեփական գիրքը ebooks.am-ում

ebooks.am-ը սկսվել է որպես համացանցի բաց աղբյուրներից հավաքված գրքերի շտեմարան։ Այսօր Հարթակն ունի նաև մյուս կողմը՝ օգտատերն ինքը կարող է գրել սեփական գիրքը և հրապարակել այն այստեղ։ Այդպես հրապարակված գրքերն ունեն իրենց առանձին բաժինը՝ «Օգտատեր-հեղինակների կողմից», իսկ գրքի էջում նշվում է «Օգտատեր-հեղինակի գիրք»։

Այս հոդվածում պատմում ենք, թե ինչպես դառնալ հեղինակ, ինչպես է գիրքը սևագրից հասնում ընթերցողին, և ամենակարևորը՝ ինչ իրավունքներ եք պահպանում ձեր ստեղծագործության նկատմամբ։ Իսկ թե ինչին արժե ուշադրություն դարձնել գրելիս, առանձին գրված է «Ինչպե՞ս գրել գիրք ebooks.am-ում» հոդվածում։

Առաջին քայլը՝ հեղինակի էջ

Ամեն ինչ սկսվում է վահանակի «Հեղինակել» էջից։ Քանի դեռ հեղինակի էջ չկա, այդ բաժինը ցույց է տալիս մեկ առաջարկ՝ «Դարձեք հեղինակ»։ Հեղինակի էջն այն է, ինչ ընթերցողները տեսնում են ձեր բոլոր հրապարակված գրքերում, ուստի այն ստեղծվում է հրապարակելուց առաջ։

• Անուն և ազգանուն, իսկ ցանկության դեպքում՝ կեղծանուն։ Առանձին նշում եք, թե որ անունով եք ուզում հրապարակվել։
• Հրապարակային հասցե՝ ձեր էջի հասցեն ebooks.am/author/… տեսքով։ Թույլատրվում են միայն փոքրատառ լատինական տառեր, թվեր և գծիկներ, իսկ հասանելիությունը ստուգվում է հենց մուտքագրելու պահին։
• Կենսագրություն՝ մինչև 280 նիշ, որը ցուցադրվում է ձեր հեղինակի էջում։
• Վայր և լուսանկար՝ JPG կամ PNG, առնվազն 400×400 փիքսել։

Այս տվյալներից ոչ մեկը վերջնական չէ. հեղինակի էջը կարող եք խմբագրել ցանկացած պահի։

Գիրքը՝ գրված այստեղ կամ ներմուծված

Նոր գիրք ստեղծելիս հարցվում է ընդամենը երեք բան՝ վերնագիր, հիմնական ժանր և լեզու։ Երեքն էլ կարող եք փոխել ավելի ուշ։ Այնուհետև երկու ճանապարհ կա։

1. 1

   Գրել Հարթակում

   Խմբագրիչում կարող եք գրել գլուխներով կամ որպես մեկ ամբողջական տեքստ։ Հասանելի են թավ, շեղ և ընդգծված գիրը, վերնագրերը, կետային ու համարակալված ցանկերը, մեջբերումն ու բաժանարարը։ Գրվածը պահպանվում է ինքնաբերաբար, իսկ բառերի հաշվիչը միշտ երևում է։ Գլուխները կարելի է վերանվանել, տեղափոխել և ջնջել, իսկ չվերնագրվածները ցուցադրվում են պարզապես իրենց համարով։

2. 2

   Ներմուծել EPUB ֆայլ

   Եթե գիրքն արդեն գրված է, կարող եք ներմուծել այն որպես EPUB՝ մինչև 30 ՄԲ։ Ֆայլն ինքնաբերաբար բաժանվում է գլուխների և պահվում որպես սևագիր։ Փոխարկումը կարող է որոշ ժամանակ տևել, բայց էջում սպասելու կարիք չկա՝ պատրաստ լինելուն պես կստանաք ծանուցում։

Եթե գիրքը գրել եք Word-ում, նախ արտահանեք այն EPUB ձևաչափի։ Ներմուծումից հետո արժե կարդալ ստացված գլուխները. Հարթակն առանձին ցույց է տալիս, թե փոխարկման ընթացքում ինչ է ստիպված եղել փոխել կամ բաց թողնել։

Ի՞նչ է պահանջվում ստուգման ներկայացնելուց առաջ

Գիրքը ներկայացնելու համար պետք է ամբողջական լինի։ Աշխատանքային էջում «Ներկայացնելուց առաջ» ցանկը միշտ ցույց է տալիս, թե ինչ է դեռ պակասում՝

• վերնագիր,
• նկարագրություն՝ գոնե մեկ նախադասություն, թե ինչի մասին է գիրքը,
• շապիկի նկար,
• հիմնական ժանր,
• գրված տեքստ. դատարկ գլուխներով գիրքը չի ներկայացվում։

Ստուգում և հրապարակում

Ներկայացնելիս կարող եք ստուգողին թողնել հաղորդագրություն՝ ինչ եք փոխել կամ ինչին կցանկանայիք, որ ուշադրություն դարձնեն։ Դա հատկապես օգտակար է կրկնակի ներկայացման դեպքում։ Գրքի վիճակը երևում է կարգավիճակով՝ «Սևագիր», «Ստուգման փուլ», «Հրապարակված», իսկ անհրաժեշտության դեպքում՝ «Պահանջվում են փոփոխություններ», «Ցանկից հանված» կամ «Հեռացված»։

Որոշման մասին տեղեկանում եք ծանուցումով՝ գիրքը հրապարակվել է, կամ հրապարակելուց առաջ պահանջվում են փոփոխություններ։ Երկրորդ դեպքում ծանուցումը և գրքի էջը ցույց են տալիս պատճառը, իսկ ստուգման ամբողջ պատմությունը պահվում է որպես զրույց, այնպես որ միշտ կարող եք վերընթերցել, թե ինչ է խնդրվել նախորդ անգամ։

Արդեն հրապարակված գիրքը խմբագրելը ընթերցողների տեսածը չի փոխում. նրանք շարունակում են տեսնել հրապարակված տարբերակը, իսկ ձեր փոփոխությունները հասանելի են դառնում միայն հաջորդ ստուգումից հետո։

Ըստ Օգտագործման պայմանների՝ ստուգումը վերաբերում է տեխնիկական և բովանդակային համապատասխանությանը և չի հանդիսանում գրքի իրավական մաքրության կամ հեղինակային իրավունքի պատկանելության հաստատում։

Ի՞նչ իրավունքներ եք պահպանում

Սա այն հատվածն է, որի համար արժե ամենաուշադիրը լինել։ Ամբողջական ձևակերպումները կարդացեք Օգտագործման պայմանների «Օգտատերերի կողմից գրված գրքերը և հեղինակային իրավունքները» բաժնում, իսկ ահա հիմնականը՝

1. 1

   Հեղինակային իրավունքը մնում է ձեզ

   ebooks.am-ը ձեր ստեղծագործության նկատմամբ սեփականության իրավունք չի ձեռք բերում և չի հավակնում դրան։ Այստեղ հրապարակելը որևէ կերպ չի սահմանափակում ձեր իրավունքը՝ նույն գիրքը հրապարակելու այլ վայրերում, տպագրելու կամ այլ կերպ տնօրինելու այն։

2. 2

   Հարթակին տրվում է միայն թույլտվություն

   Այն ոչ բացառիկ է և անհատույց՝ գիրքը պահելու, տեխնիկապես մշակելու, ընթերցողներին ցուցադրելու, ինչպես նաև վերնագիրը, շապիկը, նկարագրությունը և ոչ մեծ հատվածներ Հարթակի ներսում ու Հարթակի մասին նյութերում օգտագործելու համար։ Այն չի ներառում գիրքը վաճառելու, լիցենզավորելու կամ երրորդ անձանց փոխանցելու իրավունք։

3. 3

   Որոշումը ցանկացած պահի հետարկելի է

   Գիրքը կարող եք հանել ցանկից կամ ջնջել։ Այդ պահից այն դադարում է հասանելի լինել ընթերցողներին, և թույլտվությունը դադարում է գործել՝ բացառությամբ տեխնիկապես անհրաժեշտ պահուստային պատճենների ու ժամանակավոր քեշի, որոնք հեռացվում են ողջամիտ ժամկետում։ Ցանկից հանված գիրքը հետ վերադարձնելը նոր ստուգում չի պահանջում, և գրվածից ոչինչ չի կորչում։

4. 4

   Երրորդ անձանց չի տրամադրվում

   Օգտատերերի գրած գրքերը չեն վաճառվում, չեն լիցենզավորվում և չեն փոխանցվում որևէ երրորդ անձի՝ ներառյալ այլ հրատարակիչներ, կայքեր, գովազդային ցանցեր, տվյալների բրոքերներ և արհեստական բանականության մոդելներ մշակող ընկերություններ։ Հարթակն այդ բովանդակությունը չի օգտագործում նաև որևէ արհեստական բանականության մոդելի ուսուցման նպատակով։ Բացառություն են միայն ամպային ծառայություններ մատուցողները, որոնց սերվերներում տեխնիկապես պահվում են տվյալները, և օրենքով նախատեսված դեպքերը։

5. 5

   Ձեր հավաստիացումը

   Գիրք հրապարակելով՝ դուք հաստատում եք, որ այն ձեր ստեղծագործությունն է կամ որ ունեք այն հրապարակելու բոլոր անհրաժեշտ իրավունքները։ Ուրիշի գործը որպես սեփականը ներկայացնելը հանգեցնում է գրքի հեռացման, իսկ կրկնվելու դեպքում՝ նաև հաշվի արգելափակման։

Ընթերցողի կողմից էլ պայմանները հստակ են. օգտատերերի գրած գրքերը տրամադրվում են բացառապես անձնական ընթերցանության համար։ Առանց հեղինակի թույլտվության արգելվում է դրանք պատճենել, տարածել, թարգմանել, հրապարակել այլ վայրերում, օգտագործել առևտրային նպատակով, հավաքել ավտոմատացված միջոցներով կամ օգտագործել արհեստական բանականության մոդելների ուսուցման համար։ Խախտումը հանգեցնում է հաշվի արգելափակման։

Տեքստի պաշտպանությունը և դրա սահմանները

Հրապարակված գրքերը ցուցադրվում են որպես տեքստ՝ բացառապես առցանց ընթերցելու համար։ Տեքստի ընտրումը, պատճենումը և համատեքստային ընտրացանկն անջատված են, իսկ գիրքը ֆայլով ներբեռնելու հնարավորություն չի տրամադրվում։

Այնուամենայնիվ, համացանցում ցուցադրվող որևէ տեքստ սկզբունքորեն հնարավոր չէ լիարժեք պաշտպանել։ Չարամիտ գործող անձը կարող է դիտել էջի կոդը, օգտվել բրաուզերի գործիքներից, էկրանի պատկերի հանույթ անել, լուսանկարել էկրանը, կիրառել տեքստի ճանաչման ծրագրեր կամ պարզապես ձեռքով վերատպել տեքստը։ Այդ ամենը կատարվում է ընթերցողի սարքի վրա և գտնվում է Հարթակի վերահսկողությունից դուրս։

Հետևաբար Հարթակը չի կարող երաշխավորել, որ հրապարակված գիրքը չի պատճենվի կամ չի տարածվի առանց ձեր թույլտվության։ Գիրքը հրապարակելու որոշումն ընդունեք՝ գիտակցելով այս ռիսկը, իսկ եթե ձեր ստեղծագործության համար այն ընդունելի չէ, ավելի ճիշտ կլինի չհրապարակել այն։

Հրապարակելուց հետո

Հրապարակված գիրքը դառնում է գրադարանի լիարժեք մաս. ընթերցողները կարող են այն կարդալ առցանց, գնահատել, կարծիք գրել, մասնակցել քննարկումներին, պիտակավորել և ավելացնել իրենց ցուցակներում։ Գիրքը հայտնվում է «Օգտատեր-հեղինակների կողմից» բաժնում, իսկ նրա էջում նշվում է «Օգտատեր-հեղինակի գիրք»։

Ձեզ համար բացվում է նաև վիճակագրությունը՝ քանի հոգի է կարդում հիմա, քանիսն են ավարտել, քանիսն են ուզում կարդալ, ինչ գնահատականներ և մեկնաբանություններ կան։

Հարցե՞ր ունեք

Եթե ինչ-որ բան մնաց անհասկանալի կամ ուզում եք հրապարակելուց առաջ ճշտել որևէ մանրամասնություն, գրեք info@ebooks.am հասցեին։ Հեղինակների գրքերին վերաբերող բոլոր պայմանները ամբողջությամբ շարադրված են Օգտագործման պայմաններում։